واحد عزيز عليَ سافر ... ومن ساعة ما سافر ... ماشفتهوش
لأ ... باشوفه كل يوم ... لكن مابعرفوش
لأ ... ده أنا ماسبتهوش ... ماتستغربوش
كل أخباره عندي ... وأفكاره ومشاعره مني
وباشوفه كل يوم ... لكن مابعرفوش
أصله اتغير خالص ... بس أصله ماغيرهوش
كلامه وضحكه قل ... زي ما تقول كده ... مل
مل من 100 جنس ولون ... أمم من غير روح
مل من صوته ... من شكله ... من أدواته اللي مابتفارقهوش
مل من شعوب ... الفكر فيها جوهرة نادرة
ومع غناهم ... على تمنها ما يقدروش
باشوفه كل يوم ... لكن مابعرفوش
أصله مشغول أوي ... بيع وشرا ومخازن وإدارة
علاقات ومشاريع وبيزنس ... شطارة
عارفين؟! ... كلها حاجات ماتهمهوش ... ما تسألوش
حلمه بس يعيش مبسوط ... حياة بسيطة ماتتعبوش
ويا انسانة بقلبها مربوط ... ضحكتها تملا حياته
صوتها يطمن قلبه ... روحها تونس روحه
يعيشوا سوا ... وأبداً ماتحوشوش
باشوفه كل يوم ... لكن مابعرفوش
مش هو ده ... اللي كانت ضحكته على طول وياه
مش هو ده ... اللي كان مبدأه ... أصحابي عني مايبعدوش
يمكن تقولوا طفل ... وماله ... دي حاجة ماتضايقهوش
ماهو حلمه كان ... يفضل طفل والدنيا ماتكبروش
يمكن يكون كبر ... لكن الطفل اللي جواه ماموتوش
باشوفه كل يوم ... لكن مابعرفوش
حلمي أشوفه تاني ... يرجع زي ما كان
صوته وضحكته وحكاياته اللي مابيخلصوش
ويا بيته وأهله وحبيبته ... اللي عنه مايستغنوش
محدش يشوفه ... ويعرفه ... ومايحبهوش
وأشوفه كل يوم وعينَي فيه مايغلطوش
